ސްޓެލްކޯގެ ނަމުގައި ބައަކު ވަގު ފޯނު ކޯލުތަކެއް ކުރާ ކަމުގެ މައުލޫމާތު އެކުންފުންޏަށް ލިބިފައިވާ ކަމަށާއި އެފަދަ ކޯލްތަކަށް ސަމާލުވެލައްވަން ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ އިލްތިމާސްކުރައްވައިފިއެވެ.
ފަހުމީ ވިދާޅުވީ އެއްވެސް ކަސްޓަމަރެއްގެ ޒާތީ، މާލީ ހާލަތާއި ގުޅޭ އެއްވެސް މައުލޫމާތެއް ހޯދަން ސްޓެލްކޯއިން އެއްވެސް ކަސްޓަމަރަކަށް ފޯނުން ނުގުޅާނެ ކަމުގައެވެ. އަދި އެބާވަތުގެ މައުލޫމާތު ހޯދަން އެއްވެސް ފަރާތަކުން ގުޅައިފިނަމަ، އެކަމުގެ މައުލޫމާތު ސްޓެލްކޯއާއި ހިއްސާކުރެއްވުމަށްވެސް ވަނީ އެދިވަޑައިގެންފައެވެ.
ސްޓެލްކޯއިން ވަނީ ދާދިފަހުން 1545 ގެ ނަމުގައި ހޮޓްލައިނެއް ގާއިމުކޮށް، ސޯޝަލް މީޑިއާގެ ވަސީލަތްތަކުންވެސް އެކުންފުންޏާއި ގުޅޭނެ ފަސޭހަ ގޮތްތައް ހަމަޖައްސައިދީފައެވެ.
