އޮފީހުގައި ތިބެގެން ކުންފުނީގެ ހުރިހާ ޓްރާންސްފޯމަރުތައް ކޮންޓްރޯލްކޮށް ލޯޑް ކަލްކިއުލޭޓް ކުރެވޭނެ: ސްޓެލްކޯ އެމްޑީ

އޮފީހުގައި ތިބެގެން މިހާރު ސްޓެލްކޯގެ ހުރިހާ ޓްރާންސްފޯމަރުތައް ކޮންޓްރޯލްކޮށް، ލޯޑް ކަލްކިއުލޭޓް ކުރެވޭނެ ކަމަށް އެ ކުންފުނީގެ މެނޭޖިންގ ޑިރެކްޓަރު ހުސައިން ފަހުމީ ވިދާޅުވެއްޖެއެވެ.

ސްމާޓް ގްރިޑުގެ މަސައްކަތްތަކާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން ފަހުމީ ވިދާޅުވީ ސްޓެލްކޯގެ ހުރިހާ އިންޖީނުތައް އޮޕަރޭޓްކުރަމުންދަނީ އެސްކާޑާ ސިސްޓަމެއް މެދުވެރިކޮށް ކޮމްޕިއުޓަރު މެދުވެރިކޮށް ކަމުގައެވެ. އަދި ޑިސްޓްރިބިއުޝަން ސިސްޓަމް މިހާރު ސްމާޓް ގްރިޑަކަށް ބަދަލުކޮށްފައިވާ ކަމަށާއި، މިއާއެކު ހުރިހާ ޓްރާންސްފޯމަރުތައް އޮފީހުގައި ތިބެގެން ކޮންޓްރޯލްކޮށް ލޯޑް ކަލްކިއުލޭޓް ކުރެވޭނެ ކަމުގައެވެ. ފަހުމީ ވިދާޅުވީ، ސްޓެލްކޯގެ މުޅި ނެޓްވޯކް ސްމާޓް ގްރިޑަކަށް މިހާރު ބަދަލުކޮށްފައިވާއިރު، ދެން ކުރިއަށްދާނީ ސްމާޓް މީޓަރު ހަރުކުރުމުގެ މަސައްކަތް ކަމުގައެވެ. އަދި ސްމާޓް މީޓަރު އިންސްޓޯލް ކުރުމަށް ލަސްވެފައިވަނީ ސްމާޓް ގްރިޑް އިމްޕްލިމަންޓްކޮށް ނިމެންދެން މަޑުކޮށްލާފައިވާތީ ކަން ފަހުމީ ފާހަގަކުރެއްވިއެވެ.

”ޓޯޓަލް ސޮލިއުޝަން މި ލިބެނީ ސްމާޑް ގްރިޑާއި ސްމާޓް މީޓަރާ އެއްކޮށް އައިމަ.“ ފަހުމީ ވިދާޅުވިއެވެ.

ސްޓެލްކޯގެ އަމާޒަކީ ކުރިއަށް އޮތް 3 އަހަރު ދުވަހުގެ ތެރޭގައި އެކުންފުނީގެ ހުރިހާ ކަސްޓަމަރުން ސްމާޓް މީޓަރަށް ބަދަލު ކުރުމެވެ.