އެބުނާ ފައިސާތަކެއް ދޭނެ ހާލަތެއް ނާދޭ، އެދުވަހު ރައީސް މުއިއްޒު އަށް އޮތީ ޖެއްސުމާއި ދުއްތުރާ: މަންޑ
ރައީސް ޑރ.މުހައްމަދު މުއިއްޒު، ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ޖާސޫސު ކުރެއްވުމަށް ކަމަށް ބުނެ ކުރީގެ ނައިބު ރައީސް އަހުމަދު އަދީބު އަތުން 14 މިލިއަން ރުފިޔާ ނެންގެވި ވާހަކަ މާލެ ސިޓީ ކައުންސިލްގެ ކޮންސަލްޓެންޓް އަދި އާރުޑީސީގެ ކުރީގެ ޑެޕިއުޓީ މެނޭޖިން ޑިރެކްޓަރ އަހުމަދު މަމްދޫހު (މަންޑޭ) ދޮގު ކުރައްވައިފިއެވެ.
އަންގާރަ ދުވަހުގެ ރޭ ފްރޮންޓް ޕާޓީން ބޭއްވި ޖަލްސާއެއްގައި ރައީސް ޔާމީން އެހެން ވިދާޅުވުމާ ގުޅިގެން މަންޑޭ އެކްސްގައި ކުރެއްވި ޕޯސްޓެއްގައި ވިދާޅުވީ، އެއީ ގަބޫލު ކުރެވޭނެ ވާހަކައެއްނޫން ކަމަށާއި އެކަމުގެ ހަގީގަތް ވަރަށް ރަނގަޅަށް އެނގިވަޑައިގަންނަވާ ކަމުގައެވެ.
އެގޮތުން ރައީސް މިނިސްޓަރަކަށް ހުންނެވި އިރު ކެބިނެޓް ތެރޭގައި އަދި ރައީސް އޮފީސް ތެރޭގައި އަދީބު ގެ ފަރާތްޕުޅުން އެމަނިކުފާނަށް ކުރިމަތިވި ޖެއްސުންތަކާއި، އުދަނގޫތަކާއި، މަލާމާތްތައް މަންޑޭ އާއި ރައީސް މުއިއްޒު ހިއްސާކުރެއްވި ކަމަށާއި، އެވަރުގެ ގުޅުމެއް އެ ދެބޭފުޅުންގެ މެދުގައި އުފެދޭނެ އެއްވެސް ހާލަތެއް ނެތްކަން މަންޑޭ ފާހަގަކުރެއްވިއެވެ.
”އޭރު އެމަނިކުފާނު ކެބިނެޓް ތެރޭގައި ހުންނެވީ ބާކީ ކޮށްލުވާފައި، ސަބަބަކަށް ވަނީ ރައީސް މުއިއްޒު އެހެން މިނިސްޓަރުންނަށް ވުރެ ޕާރފޯމަންސް ރަނގަޅުވުން. މަސައްކަތްތަކަށް އިހުލާސްތެރިވުން. މިކަމުގެ ސަބަބުން އެހެންމީހުންނަށް ހުރި ވަރަށް ބޮޑުޗެލެންޖަކަށް ވީ ރައީސް މުއިއްޒު. އެތައް ފަހަރަކު މިނިސްޓަރ ކަމުން ވަކިކުރުވަން މަސައްކަތް ކުރި، އެއިރު ރައީސް ޔާމީންގެ ކެބިނެޓްގައި ތިއްބެވި ވަޒީރުންނަށް ވެސް އެނގިލައްވާނެ މިއީ ހަގީގަތެއްކަން.“ މަންޑޭ ވިދާޅުވިއެވެ.
ރައީސް ޔާމީނާއި އެމަނިކުފާނުގެ އާއިލާ ރިޔާސީ ލޯންޗު ކޮޅު ތެރޭގައި“ ގޮއްވާލަން“ ދިން ހަމަލާގެ މައްސަލައިގެ ތަހުގީގީ މަރުހަލާގައި، އިހުލާސްތެރިކަމާއެކު އެންމެ ބޮޑު މަސައްކަތެއް އަދި އެހީތެރިކަމެއް ފޯރުކޮށްދެއްވީވެސް ރައީސް މުއިއްޒު ކަމަށް މަންޑޭ ވިދާޅުވިއެވެ. އެކަމުގެ ހަގީގަތް އެންމެ ރަނގަޅަށް އެނގިވަޑައިގަންނަވާ ބޭފުޅުންގެ ތެރޭގައި އެބޭފުޅާވެސް ހިމެނޭކަން މަންޑޭ ފާހަގަކުރެއްވިއެވެ.
”މިހެން މިކަންކަން ހިނގާފައިވަނިކޮށް، ކޮން ސިކުނޑިއަކުންތޯ ގަބޫލު ކުރެވޭނީ ، ނޫނީ ކާކުތޯ ގަބޫލު ކުރާނީ، ރައީސް ޔާމީނަށް ޖާސޫސު ކުރުމަށް އަދީބު، ރައީސް މުއިއްޒު އަށް 14 މިލިއަން ކީއްތޯ ރައީސް މުއިއްޒު އަރިހުގައި އެކަން ކޮށްދެއްވާށޭ ނަމަވެސް ބުނެފާނެ ކަމަށް.“ މަންޑޭ ވިދާޅުވިއެވެ.
މަންޑޭ މިފަދައިން ވިދާޅުވިއިރު، ރައީސް ޔާމީން މިހާރަކަށް އައިސް ދައްކަވާ ބައެއް ވާހަކަފުޅުތައް ބަލައިގަންނަން ދަތިކަމަށް ރައީސް މުއިއްޒު އާއި އަރިސް ބޭފުޅުން ފާހަގަކުރައްވައެެވެ. އެއާ ހިލާފަށް ރައީސް ޔާމީނާ އަރިސް ބޭފުޅުން ދަނީ ރައީސް މުއިއްޒު އަށާއި ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ. އެގޮތުން ދެފަރާތުން ވެސް އަންނަނީ ބޮޑެތި ތުހުމަތު ތަކެއް ކުރަމުންނެވެ.
