ކަރަންޓު އިގްތިސާދު ކުރުމަށް ކުރެވިދާނެ ކަންކަމާއި ގުޅޭގޮތުން އިލްމީ ދިރާސާއެއް ހެދުމަށް، ސްޓެލްކޯ އިން މޯލްޑިވްސް ނެޝެނަލް ޔުނިވާސިޓީ (އެމްއެންޔޫ) އާއި އެކު ފަހުމުނާމާއެއްގައި ސޮއިކޮށްފިއެވެ.
ސްޓެލްކޯގެ ފަރާތުން މި ފަހުމުނާމާގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީއެވެ. އަދި އެމްއެންޔޫ ގެ ފަރާތުން ސޮއި ކުރެއްވީ އެ ޔުނިވާސިޓީގެ ވައިސް ޗާންސެލަރ އައިޝަތު ޝެހެނާޒް އާދަމް އެވެ.
މި ދިރާސަ ހަދާއިރު ވޭތުވެ ދިޔަ 10 އަހަރު ދުވަހުގެ ޑޭޓާ އިވެލުއޭޓު ކުރާނެއެވެ. އަދި މި ދިރާސާގައި އަސާސީ މަގްސަދަކީ ބިލްކުރުމުގައި ދިމާވާ އެކި މައްސަލަތަކުގެ އަސްލު ސަބަބުތައް ދިރާސާކޮށް، ކަރަންޓު ބޭނުންކުރާ ވައްޓަފާޅި އާއި، މޫސުމީ ބަދަލުގެ ސަބަބުން އެކަމަށް ކުރާ އަސަރު ދެނެގަނެ، ބިލްކުރުމުގެ ނިޒާމުގައި ހާމަކަން ބޮޑުކަމާއި، ސައްހަކަމާއި، ކަސްޓަމަރުންގެ ހިތްހަމަޖެހުން އިތުރުކުރުމަށް އިސްތިރާޖުތައް އެކުލަވާލާނެއެވެ.
މިކަމާ ގުޅޭގޮތުން ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވީ، އެމްއެންޔޫގެ ދިރާސާ އަށް ބޭނުންވާ ހުރިހާ އެހީތެރިކަމެއް ސްޓްލެކޯ އިން ފޯރުކޮށްދޭނެ ކަމުގައެވެ. އަދި އެކަމަށް ބޭނުން ހުރިހާ މައުލޫމާތެއް، އެއްވެސް ހިފެހެއްޓުމެއް ނެތި އެމްއެންޔޫއަށް ދޭނެ ކަމަށާއި، އެކަމުގައި އެއްވެސް އިމެއް ނުވަތަ މިނެއް ނޯންނާނެ ކަމުގެ ޔަގީންކަން ފަހުމީ ދެއްވިއެވެ.
