މާލެ ސަރަހައްދުގައި ކަރަންޓު ބިލު ބޮޑު ގެތަކަށް ސްޓެލްކޯގެ ޓީމުތައް ފޮނުވައިގެން ބިލު ބޮޑުވާ ސަބަބު ދެނެގަތުމުގެ ދިރާސީ މަސައްކަތް ފެށުމަށް ސްޓެލްކޯ އިން ނިންމައިފިއެވެ.
ސްޓެލްކޯއިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެކުންފުނީގެ މެނޭޖިން ޑިރެކްޓަރު ހުސައިން ފަހުމީ ވިދާޅުވީ ކަރަންޓް ބިލުތައް ބޮޑުވާ ސަބަބު ކަސްޓަމަރުންގެ އިތުރުން ސްޓެލްކޯއާއި ރައްޔިތުންނަށް ވެސް އެނގެންޖެހޭ ކަމުގައެވެ.
އެނާޖީ އޮޑިޓެއް ކުރަން ނިންމާފައިވާކަން ފާހަގަކުރައްވައި ފަހުމީ ވިދާޅުވީ ކަރަންޓު ބިލް ބޮޑުވުމުގެ ޝަކުވާ އަބަދުވެސް ލިބޭ ކަމަށާއި އެހެން ނަމަވެސް އެހެން ފަހަރުތަކާއި ހިލާފަށް މިމަހު ސްޓެލްކޯއަށް ލިބިފައިވާ ޝަކުވާ މަދު ކަމުގައެވެ.
”މިދިޔަ މަހާ އަޅާ ބަލާއިރު މިމަހު މާލޭގެ 94 އިންސައްތަ ބިލު ކުޑަކަމަށް ފާހަގަ ކުރެވޭ. އަދި މާލޭގެ 6 އިންސައްތަ ބިލު އިންތިހާއަށް ބޮޑުކަން ފާހަގަ ކުރެވޭ. އަދި ހުޅުމާލޭގެ 15 އިންސައްތަ ބިލު ވަރަށް ބޮޑުކަން ފާހަގަ ކުރެވޭ.“ ފަހުމީ ވިދާޅުވިއެވެ.
ފާއިތުވެ ދިޔަ ދެ ތިން މަހު ވެސް ކަރަންޓު ބިލު ބޮޑުވެ، އާންމުންގެ ޝަކުވާތަކަށް ސްޓެލްކޯއިން ދަނީ ކެނޑިނޭޅި ހައްލު ހޯދުމަށް ގިނަ މަސައްކަތްތަކެއް ކުރަމުންނެވެ.
