މޯލްޑިވްސް ހާފް މެރެތަން 2024 ގައި މިފްކޯގެ ގިނަ އަދަދެއްގެ މުވައްޒަފުން ބައިވެރިވެއްޖެއެވެ.
ދުވުމާއި ކަސްރަތުގެ އެކި ހަރަކާތްތައް އިންތިޒާމު ކުރަމުން އަންނަ ”އައި ރަނާސް“ އިން މިއަދު ފަތިހު ހުޅުމާލޭ ސެންޓްރަލް ޕާކް ސަރަހައްދުގައި ބޭއްވި ހާފް މެރެތަންގައި މިފްކޯގެ 31 މުވައްޒަފުން ވަނީ ބައިވެރިވެފައެވެ.
މިކަމާ ގުޅޭ އިތުރު މައުލޫމާތު ހިއްސާކުރައްވަމުން މިފްކޯގެ ކްލަބްގެ މެންބަރު އަދި މި ހަރަކާތް ޕްލޭންކުރައްވައި، ހިންގެވުމުގައި އިސްކޮށް މަސައްކަތް ކުރެއްވި ޢަބްދުﷲ މުޝްޢިލް ވިދާޅުވިގޮތުގައި ސިއްހަތާއި ގުޅުން ހުންނަ އެފަދަ ހަރަކާތްތަކަށް އެ ކްލަބުން ހާއްސަ އަހައްމިއްޔަތުކަމެއް އަބަދުވެސް ދޭނެއެވެ.
”ދުޅަހެޔޮ ސިއްހަތެއްގައި ދެމި ތިބުމަށް މިފަދަ ހަރަކާތްތައް ވަރަށް މުހިންމު. އެގޮތުން މި މަސައްކަތް ކުރިއަށް ގެންދިއުމުގައި މިފްކޯގެ މެނޭޖުމެންޓާއި ހީވާގި މުވައްޒަފުންގެ ފަރާތުން ލިބުނު ސަޕޯޓަށް ވަރަށް ބޮޑަށް ޝުކުރު ދަންނަވަން.“ މުޝްޢިލް ވިދާޅުވިއެވެ.
5 ކިލޯ މީޓަރުގެ ސެގްމެންޓުގައި މިފްކޯގެ މުވައްޒަފުން ބައިވެރިވިއިރު، އެ ކުންފުނީގެ ބިޒްނަސް ޑިވެލޮޕްމަންޓް ޖެނެރަލް މެނޭޖަރު ސަނިއްޔާ ޢަބްދުﷲ ވަނީ 21 ކިލޯ މީޓަރުގެ ހާފް މެރެތަން ނިންމަވާފައެވެ.
މިފްކޯއިން ބުނިގޮތުގައި އެ ކުންފުނީގެ ކްލަބުން ރާވައި، ހިންގަން މަޝްވަރާކުރެވިފައިވާ ކަންކަމުގެ މައުލޫމާތު ވަރަށް އަވަހަށް ހިއްސާކުރާނެއެވެ.
