މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)އިން ކަޅުބިލަ މަސް ގަންނަ އަގު ބަދަލުކުރަން ނިންމައިފިއެވެ.
މިފްކޯއިން ރޭ ނެރުނު ނޫސްބަޔާނެއްގައޮ ބުނީ، މަސްވެރިންގެ އަތުން ގަންނަ މަހަށް ދޭންޖެހޭ ފައިސާ ގަވާއިދުން ދެވޭނެ އިންތިޒާމެއް ހަމަޖެއްސުމަށްޓަކައި 1 ޖުލައިއިން ފެށިގެން މިފްކޯއިން މަސްވެރިން އަތުން މަސްގަންނަމުންދާނީ ބައިނަލްއަގްވާމީ ބާޒާރުގައި ގަނޑުކުރި ކަޅުބިލަމަހުގެ އަގު ހުރި މިންވަރަށާއި، މަސް ގަނެ އެކްސްޕޯޓުކުރުމަށް ހިނގާނޭ ހަރަދުތަކަށް ބަލައި، ކޮންމެ ހަފްތާއަކު ކަނޑައަޅާ އަގައްގައި ކަމުގައެވެ.
”މިއަގު ކޮންމެ ހަފްތާއަކު އާއްމުކޮށް މިފްކޯއިން އިއުލާންކުރަމުންގެންދާނެ.“ މިފްކޯގެ ބަޔާނުގައި ވެއެވެ.
މިފްކޯއިން ބައިނަލްއަގްވާމީ ބާޒާރުގައި މަސްވިއްކުމަށްފަހު ލިބޭ އާމްދަނީއަށްވުރެ މަސްވެރިންގެ އަތުން ގަންނަ މަހަށް ދައްކަންޖެހޭ ފައިސާއާއި މަސް ގަނެ، ޕްރޮސެސްކޮށް، ވިއްކުމަށް ހިނގާ ހަރަދު ބޮޑުތަނުން އިތުރުވާތީ ކުންފުންޏަށް އިތުރަށް ބޭނުންވާ ފައިސާ މިހާތަނަށް ހަމަޖައްސާފައިވަނީ ލޯނު ނަގައިގެންނާއި ސަރުކާރުގެ އެހީގައެވެ. 1 ޖުލައިގައި ދޫކުރާ ފައިސާ ހިމަނައިގެން މިއަހަރުގެ މިހާތަނަށް އައިއިރު ސަރުކާރުން 353 މިލިއަން ރުފިޔާ ވަނީ މަސްވެރިންނަށް ދޫކޮށްފައެވެ. މީގެ އިތުރުން، މިފްކޯއަށް ލިބިފައިވާ އާމްދަނީއިން މަސްވެރިން ކިރުވާފައިވާ މަހަށް އިތުރު 389 މިލިއަން ރުފިޔާ ވަނީ ދޫކޮށްފައެވެ.
އެގޮތުން ތެލާއި އައިސްއަށް ދީފައިވާ ކުރެޑިޓު ހިމެނޭހެން 831 މިލިއަން ރުފިޔާ މިއަހަރު ވަނީ މަސް ދޯނިފަހަރަށް ދޫކުރެވިފައެވެ. މިހާރު މަސް ގަންނަމުންދާގޮތަށް މާކެޓު އަގަށް ރިއާޔަތްނުކޮށް މަސްވެރިންގެ އަތުން މަސްގަނެ ޕްރޮސެސްކޮށް އެކްސްޕޯޓުކުރަމުން ދިއުމަކީ މާލީގޮތުން ކުންފުންޏަށް ބޮޑު ބުރައެކެވެ.
މީގެ އިތުރުން، މިފްކޯގެ އެފިޝަންސީ އިތުރުކޮށް، އާމްދަނީ އިތުރުކުރެވޭނެ އިތުރުގޮތް ގޮތް ބަލައި، ހަރަދުތައް ކުޑަކުރުމަށް ހަރުދަނާ ފިޔަވަޅުތައް ސަރުކާރުގެ ކަމާއި ގުޅޭ ވުޒާރާތަކާއި ގުޅިގެން އަޅަމުންދާނެކަން އެ ކުންފުނިން ބުންޏެވެ. އަދި އެކަމުގެ ތަފްސީލްތައް މީޑިއާއާއި ގަވާއިދުން ހިއްސާކުރަމުންދާނެ ކަމަށް މިފްކޯއިން ބުންޏެވެ.
މަސްވެރިން މިފްކޯއަށް ކިރުވާފައިވާ މަހަށް މިހާތަނަށް ދައްކަންޖެހިފައިވާ ފައިސާ ސަރުކާރާއި މިފްކޯއާއި ގުޅިގެން ކުރެވުނު މަސައްކަތުން މިއަދު ދޭނެއެވެ. އެކަމަކު މިއަދުން ފެށިގެން މި ހަފްތާގެ ނިޔަލަށް ދެން މިފްކޯއިން މަސް ކިލޯއެއް ގަންނާނ ީ16 ރުފިޔާއަށެވެ. އެކަމަކު އެ އަގު ކުރިއަށް އޮތް ތަނުގައި ދާނީ ބަދަލުވަމުންނެވެ. އަދި އެ ކުންފުނިން ބުނީ ދެން މަސް ގަންނާނީ ކުންފުންޏަށް ކުޅަދާނަ ވާވަރުގެ އަގެއްގައި ކަމަށާއި، ކުންފުނީގެ ހަރަދުތައް ބޮޑުތަނުން ކުޑަ ކޮށްގެން އޮޕަރޭޝަން ހިންގޭނެ ގޮތަށް މިފްކޯ ބައްޓަން ކުރަމުން އަންނަ ކަމުގައި އެ ކުންފުނިން ބުނެއެވެ.
ބަރާބަރު ނިންމުމެއް