ދައުލަތުގެ ބެލުމުގެ ދަށުގައި ބަންދުކޮށްފައި ހުރި ށ. ފުނަދޫ، ޒަމާނީވިލާ، މުހައްމަދު ޖަމީލް ނިޔާވެފައި އޮއްވައި، ފެނުނު މައްސަލާގައި ކަންބޮޑުވުމާއި ޝައްކުއުފެދޭ ކިތަންމެ ކަމެއް ހުރުމުން އެ މައްސަލަ ތަހުގީގު ކޮށްދިނުމަށް އެދި ދަ ޑިމޮކްރެޓްސް އިން ހިއުމަން ރައިޓްސް ކޮމިޝަނަށް ހުށަހަޅައިފިއެވެ.
ދަ ޑިމޮކްރެޓްސް އިން ދެންމެ ނެރުނު ބަޔާނެއްގައި ބުނީ ޖަމީލުގެ ހަށިގަނޑުގައި ނޫފައިގެންފައިވާ ތަންތަނާއި އަނިޔާކޮށް، ފަރުވާ ދިނުމުގައި އިހުމާލުވެފައިވާ ކަމުގެ ނިޝާންތައް ހުރިކަމުގެ ޝަކުވާ އާއި ކަންބޮޑުވުންތައް އާންމުންގެ މެދުގައި އެބައޮތް ކަމުގައެވެ. އެހެން ކަމުން ޖަލު އޮފިސަރުން އެފަދަ އަނިޔާއެއް ކޮށްފައިވޭތޯ އާއި، ފަރުވާގެ އިހުމާލެއް ވެފައިވޭތޯ ނުވަތަ ބަންދު މުއްދަތުގައި ގާނޫނީ އެންމެހާ ހައްގުތައް ލިބިފައިވޭތޯ ބަލައި އެ މައްސަލަ ތަހުގީގު ކޮށްދިނުމަށް އެދި އެޕާޓީން ވަނީ އެޗްއާރުސީއެމަށް ސިޓީއެއް ހުށަހަޅާފައެވެ.
ޖަމީލު ނިޔާވީ މިމަހުގެ 28 ވީ ހުކުރު ދުވަހުގެ މެންދުރު 12:45 ގައެވެ. އެވަގުތު އޭނާ ހުރީ ނަމާދުގައި ކަން ކެމެރާއިން ފެންނަ ކަމުގައި ހޯމް މިނިސްޓަރ އިހުސާން ވިދާޅުވިއެވެ. އަދި އެ ސީސީޓީވީ ފޫޓޭޖުވެސް ވަނީ އާންމުކޮށްފައެވެ. އެހެން ނަމަވެސް އޭނާގެ ގައިގެ އިތުރުން މޫނުގައި ނޫފައިގެންފައި ހުރި ފޮޓޯތައް މީސް މީޑިއާގައި ދަނީި ދައުރުވަމުންނެވެ.
ޖަމީލުގެ މަރާއި ގުޅިގެން ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ، އޭނާގެ އަނގައާއި ނޭފަތުން ފޮނު ޒާތުގެ ތަކެތި ފާހަގަކުރެވިފައިވާ ކަމަށާއި، އޭނާ ބަންދުގައި ހުރި ގޮޅިންނާއި ހަށިގަނޑުން ކުޑަކަމުދެވިފައި ހުރި ކަންވެސް ފާހަގަކުރެވިފައިވާ ކަމުގައެވެ.
އޮޓޮޕްސީ ހަދަން ޖަމީލުގެ އާއިލާއިން ބޭނުން ނުވާކަން ފާހަގަކުރައްވައި މިނިސްޓަރ އިހުސާން ވިދާޅުވީ އޭނާއަށް ބަޔަކު އަނިޔާއެއް ދީގެން ނިޔާވިކަމަށް ގަބޫލު ނުކުރެވޭ ކަމަށާއި އެހެން ކަމުން އޭނާގެ ހަށިގަނޑަށް އިތުރު ގެއްލުން ދޭން ބޭނުން ނުވާ ކަމުގައެވެ.
ހަރަކާތެއް ނެތި 4 ގަޑިއިރު ވަންދެން ޖަމީލު ސަޖިދައިގައި އޮތް މައްސަލައިގައި އިހުސާން ވިދާޅުވީީ، އާއްމު އުސޫލުގެ ދަށުން ގައިދީއަކު އަޅުކަމުގައި ވާނަމަ، އޮފިސަރުން އެ ބަޔަކަށް އުދަނގޫ ނުކުރާ ކަމުގައެވެ. އެކަމަކު މީގެ ފަހުން އެއް ގަޑިއިރު ތެރޭގައި ކޮންމެ ގައިދީއަކު ބަލާނެ ކަމަށާއި، އަޅުކަމުގެ ހަރަކާތެއްގައި އޮތަސް އެ މީހާ ފުރާނަ ހުރިތޯ ޗެކް ކުރާނެކަން މިނިސްޓަރ ފާހަގަކުރެއްވިއެވެ.
ޖަމީލު ބަންދުކުރީ ކިންގް ސަލްމާން މިސްކިތުގެ މިންބަރަށް އަރައި އަޑުގަދަކޮށްގެންނެވެ. އޭނާއަކީ ގިނަ ދުވަސްތަކެއް ވަންދެން ނަފްސާނީ ބައްޔަށް ފަރުވާކުރަމުން އަންނަ މީހެއް ކަމަށް ޑޮކްޓަރުންގެ ލިޔުންތަކުން ދައްކައެވެ.
