ޚަބަރު
ކިރާ މަހަށް ފައިސާ ހޯދަން އެންމެ ގަދަޔަށް ވަކާލާތުކުރާ ކެޔޮޅު، އަންހެނަކަށް ހަމަލާ ދީގެން ހައްޔަރުކޮށްފި
މަސްވެރިން ކިރާ މަހަށް ފައިސާ ހޯދުމަށް މީސް މީޑީއާގައި އެންމެ ގަދަޔަށް ވަކާލާތުކުރާ ގއ ވިލިގިލީ ޒުވާން ކެޔޮޅު އަދި އެމްޑީޕީގެ އެކްޓިވިސްޓް އަލީ ސާޖިދު ހައްޔަރުކޮށްފި އެވެ.
ސާޖިދު ރޭ ދަންވަރު ހައްޔަރުކުރީ އެރަށު އަންހެނެއްގެ ބޮލުގައި ގާބުރިއަކުން ޖަހައި މާރާމާރީއެއް ހިންގައިގެންނެވެ.
މި މާރާމާރީގައި އަނިޔާވި 46 އަހަރުގެ އަންހެން މީހާ ގއ އަތޮޅު ހޮސްޕިޓަލަށް ގެންގޮސް ފަރުވާ ދިނުމަށްފަހު މިހާރު ދޫކޮށްލާފައިވާކަމަށް ފުލުހުން ވަނީ ބުނެފައެވެ.
އުމުރުން 32 އަހަރުގެ ސާޖިދު ހައްޔަރުކޮށްފައިވާއިރު، އެ މައްސަލަ މިހާރު ތަހުގީގު ކުރަމުން އަންނަކަމަށް ފުލުހުން ބުންޏެވެ.
ސާޖިދަކީ މަސްވެރިންނަށް ފައިސާ ނުދީ ދުވަސްވާވަރަކަށް މީސްމީޑިއާ އަދި އާންމު ތަންތަނުގައި އެންމެ އަޑުގަދަކޮށް ވާހަކަ ދައްކާ ކެޔޮޅެކެވެ.
