ރައީސް މުއިއްޒުގެ ފަސް މިލިއަން ގަސް އިންދުމުގެ މަޝްރޫއުގައި ސްޓެލްކޯ މުވައްޒަފުން ބައިވެރިވަނީ!
މިއަހަރުގެ ތިމާވެށީގެ ދުވަސް ފާހަގަ ކުރުމުގެ ގޮތުން ސްޓެލްކޯގެ މުވައްޒަފުން އިސްނަގައިގެން ގަސް އިންދުމުގެ ބޮޑު ހަރަކާތެއް ހިންގުމަށް ނިންމަވާފައިވާކަމަށް އެކުންފުނީގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވެއްޖެއެވެ.
އެމްޑީ ފަހުމީ ވިދާޅުވިގޮތުގައި މި ހަރަކާތަކީ ރައީސް ޑރ.މުހައްމަދު މުއިއްޒު ކޮޕް 28 ސަމިޓުގައި އިއުލާން ކުރައްވާފައިވާ 5 މިލިއަން ގަސް އިންދުމުގެ ޕްރޮގްރާމުގައި ހިއްސާވުމުގެ ގޮތުން ކުންފުނީގެ ހުރިހާ މުވައްޒަފުން ބައިވެރިވާ ގޮތަށް ހިންގާ ހަރަކާތެކެވެ.
މި ޕްރޮގްރާމް މެދުވެރިކޮށް ސްޓެލްކޯއިން އުފައްދާ ކަރބަން އޮފްސެޓް ކުރުމަށް ކުންފުނިން ގެންގުޅޭ އަމާޒަށް ވާސިލުވުމަށް މަގުފަހިވާނެތީ، ކުންފުނީގެ ހުރިހާ މުވައްޒަފުންވެސް މިހަރަކާތުގައި ބައިވެރިވުމުގެ މުހިންމުކަން ފަހުމީ ފާހަގަކުރެއްވިއެވެ.
ދުނިޔޭގެ ތިމާވެށީގެ ދުވަސް ފާހަގަކުރުމުގެ ގޮތުން އެންވަޔަރަމެންޓް މިނިސްޓްރީން ރާއްޖޭގައި މީހުން ދިރިއުޅޭ ހުރިހާ ރަށެއްގައާއި، ރިސޯޓުތަކުގައި ގަސް އިންދުމުގެ ޕްރޮގްރާމެއް ކުރިޔަށް ގެންދިއުމަށް ރައީސް މުއިއްޒު ނިންމަވާފައިވާއިރު، ސްޓެލްކޯއަކީ ގައުމީ މިފަދަ މަސައްކަތްތަކުގައި އިސްނަގައިގެން ނަތީޖާ ނެރުމަށް މަސައްކަތް ކުރަމުން އަންނަ ކުންފުންޏެކެވެ.
