މާލޭގެ މޭޔަރުކަމަށް ވާދަކުރައްވާ ކުރީގެ ބަންޑާރަނައިބު އާއިޝަތު އާޒިމާ ޝަކޫރަށް މޭޔަރުކަން ލިބިއްޖެނަމަ މާލޭގެ ޓްރެފިކް މައްސަލަ ހައްލު ކުރުމަށް ފުރަތަމަ 100 ދުވަހުގެ ތެރޭގައި މާސްޓާ ޕްލޭނެއް ތައާރަފުކުރައްވާނެ ކަމަށް ވިދާޅުވެއްޖެއެވެ.
މާލޭގެ ޓްރެފިކް މައްސަލަ ކިތަންމެ ވަރަކަށް ހައްލުކުރަން އުޅުނު ނަމަވެސް ޕެޑަސްޓްރިއަން ފްރެންޑްލީ މަގުތަކެއް ނެތި މަގުތަކުގެ ޓްރެފިކް މައްސަލައަށް ހައްލެއް ނުގެނެވޭނެކަމަށް އާޒިމާ ވިދާޅުވިއެވެ.
ދަރިން ގޮވައިގެން ރައްކާތެރިކަމާއެކު ހިނގާލާފައި ސްކޫލަށް ގެންދެވޭނެ މަގުތަކެއް ގާއިމުކޮށްދޭން ޖެހޭ ކަމަށާއި ވަރަށް ސީރިއަސް، ރަނގަޅު މާސްޓާ ޕްލޭނެއް ހަދަން ޖެހޭނެކަމަށް އާޒިމާ ވިދާޅުވިއެވެ.
މީގެއިތުރުން މާލޭގެ ޓްރެފިކްގެ މައްސަލަތައް ހައްލުކުރުމަށް ޓަކައި އެކަމުގެ ސަބަބުތައް ދެނެގަންނަން ޖެހޭނެ ކަމަށާއި މާލޭގައި އޮތީ ”ޓޯޓަލް ގަވަނަންސް ފެއިލިއާ“އެއް ކަމަށްވެސް އޭނާ ވިދާޅުވިއެވެ.
އާޒިމާ އިތުރަށް ވިދާޅުވީ މާލޭގެ ޓްރެފިކްގެ މައްސަލަތައް މިހާ ބޮޑުވެގެންދާ ސަބަބުތަކަށް ބަލައިފި ނަމަ ވެހިކަލެއް ޓޯ ނުކުރެވޭ މައްސަލަ ހިމެނޭކަމަށެވެ. ޓޯ ޔާޑުގައި މިހާރު ޖާގަ ނެތްކަން ފާހަގަކުރައްވާ އާޒިމާ ވިދާޅުވީ ޓޯ ޔާޑު މިހާރު ބޭނުން ކުރަނީ ވެހިކަލްތައް ރާއްޖެއިން ބޭރުން އެތެރެކޮށްގެން ގެނެސް ވިއްކެންދެން ބާއްވާ ތަނެއްގެ ގޮތުގައިކަމަށެވެ.
އަދި މާލޭގެ ވެހިކަލްގެ މައްސަލަތައް މިހާ ތޮއްޖެހިގެންދާ އިރު ގާނޫނުގައި އޮތް ގޮތަށް މާލޭގައި ބޭނުންކުރާ ވަހިކަލްގެ ކެޕެއް ކަނޑައެޅިފައި ނުވާ ކަމަށާއި މާލޭގައި ބޭނުންކުރެވޭނެ ވެހިކަލްގެ އަދަދު ކަނޑައަޅަން ޖެހޭނެ ކަމަށްވެސް އާޒިމާ ވިދާޅުވިއެވެ.
އޭނާ ވިދާޅުވީ ފަސް އަހަރު ވެފައިވާ އުޅަނދެއް ރާއްޖެއަށް އެތެރެ ނުކުރެވޭނެ ކަމަށް ގަވާއިދުގައި ބުނާ ނަމަވެސް މިދިޔަ ސަރުކާރުން އެ ގަވައިދު އުވާލާފައިވާ ކަމަށެވެ.
