ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ 13 މެންބަރުން ޕީއެންސީއަށް ރޭ ސޮއިކުރެއްވުމާއި ގުޅިގެން އެޕާޓީގެ ސުޕަމެޖޯރިޓީ ގެއްލި، ރައީސް ޑރ.މުހައްމަދު މުއިއްޒު އަޒުލު ކުރުމަށާއި ވަޒީރުންނަށް ރުހުން ނުދިން މައްސަލަ ފެއިލްވެ ޕީޕީއެމް ޕީއެންސީ އިތުރު ސިޔާސީ އައު ހަރުފަތަކަށް ޖެހިލައިފިއެވެ.
ރައީސް ޑރ. މުހައްމަދު މުއިއްޒު ބައިވެރިވެވަޑައިގެންނެވި ޕީޕީއެމް ޕީއެންސީގެ ”ފެށުން“ ޖަލްސާގައި، ޕީއެންސީއަށް ސޮއިކުރެއްވި އެމްޑީޕީ މެންބަރުން
- 1- މަރަދޫ ދާއިރާގެ މެންބަރު އިބްރާހިމް ޝަރީފް
- 2- ފޭދޫ ދާއިރާގެ މެންބަރު މުހައްމަދު ނިހާދު
- 3- މައްޗަންގޮޅި ދެކުނު ދާއިރާގެ މެންބަރު މުހައްމަދު ހައިތަމް
- 4- އިސްދޫ ދާއިރާގެ މެންބަރު އަލީ ހަމީދު
- 5- ކަނޑިތީމު ދާއިރާގެ މެންބަރު އަބްދުﷲ ޝަހީމް އަބްދުލްހަކީމް
- 6- ކުރެންދޫ ދާއިރާގެ މެންބަރު އަބްދުލްޣަނީ އަބްދުލްހަކީމް
- 7-މަތިވެރި ދާއިރާގެ މެންބަރު ހަސަން ޒަރީރް
- 8-މުލަކު ދާއިރާގެ މެންބަރު އިބްރާހިމް ނަސީރު
- 9-ނިލަންދޫ ދާއިރާގެ މެންބަރު އަބްދުލް މުހްސިން ހަމީދު
- 10- މާފަންނު ދެކުނު ދާއިރާގެ މެންބަރު އާދަމް އަލީ
- 11- ކޮމަންޑޫ ދާއިރާގެ މެންބަރު އިބްރާހިމް ރާޝިދު
- 12- ތޮއްޑޫ ދާއިރާގެ މެންބަރު ހަސަން ޝިޔާން
- 13- ގުރައިދޫ ދާއިރާގެ މެންބަރު އިބްރާހިމް ޝާޒް
އެވެ. މިއާއެކު އެމްޑީޕީއަށް މަޖިލީހުގެ ސުޕަރ މެޖޯރިޓީ ގެއްލި މައިނޯރިޓީގެ ގޮތުގައި އޮތް ދަ ޑިމޮކްރެޓްސްގެ މައްޗަށް ޕީއެންސީ ކުރި ހޯދައި، އެޕާޓީ ވަނީ މަޖިލީހުގެ މައިނޯރިޓީ ހޯދާފައެވެ.
ރޭގެ ޖަލްސާގައި ވާހަކަފުޅުދައްކަވަމުން ޕީއެންސީގެ ޗެއަރމަން އަދި ރައީސް މުއިއްޒުގެ އެޑްވައިޒަރ ކަމުގެ މަގާމުގަައި ހުންނެވި ރައީސް އޮފީހުގެ މިނިސްޓަރު އަބްދުއްރަހީމް އަބްދުﷲ ވިދާޅުވީ 2023 ވަނަ އަހަރުގެ ރިޔާސީ އިންތިޚާބު އެ ޕާޓީގެ ޓިކެޓުގައި ވާދަކުރައްވައި ޑރ.މުޢިއްޒު ކާމިޔާބުކުރެއްވިއިރު، އެ ޕާޓީގެ މެންބަރުންގެ ގޮތުގައި ތިބީ އެންމެ 3،000 މެންބަރުން ކަމުގައެވެ.
”އެ ދުވަހުން ފެށިގެން ކުރެވުނު މަސައްކަތުން 40،000 އަށްވުރެ ގިނަ މެންބަރުން މި ޕާޓީގައި އެބަތިބި.“ އަބްދުއްރަހީމް ވިދާޅުވިއެވެ.
ކުރު މުއްދަތެއްގެ ތެރޭގައި އެންމެ މެންބަރުން ގިނަ ޕާޓީގެ ގޮތުގައި ޕީއެންސީ ވެފައިވާއިރު، ރޭގެ ޖަލްސާގައި ރައީސް މުއިއްޒު ވަނީ އެޕާޓީއާ އަލަށް ގުޅިވަޑައިގެންނެވި އެމްޑީޕީގެ މެންބަރުންނަށާއި އެނޫންވެސް އެންމެހައި ބޭފުޅުންނަށް ހޫނު މަރުހަބާއެއް ދަންނަވައިފައެވެ.
