ސަރުކާރުގެ އެންމެ ބޮޑު މަޝްރޫއު ކަމަށްވާ ފުށިދިއްގަރުފަޅު ހިއްކުމުގެ މަޝްރޫއު ފަށަން ތައްޔާރުވެއްޖެއެވެ.
ރައީސް ޑރ. މުހައްމަދު މުއިއްޒު މީގެ ކުރިން އިއުލާން ކުރައްވާފައިވާ ގޮތުގައި، ފުށިދިއްގަރުފަޅުން 1،280 ހެކްޓަރު ހިއްކާނެއެވެ. އެ ރަށުގައި 31،500 ހައުސިން ޔުނިޓް އެޅުމާއެކު ތަރައްގީގެ އިތުރު ބޮޑެތި ޕްރޮޖެކްޓުތައް ހިންގުމަށް ވަނީ ނިންމާފައެވެ. ރައީސް ޑރ. މުއިއްޒު އެ މަޝްރޫއު ފައްޓަވައިދެއްވާއިރު، އެ މަޝްރޫއުގެ ބޭނުމަށް ރައީސްގެ ގަރާރަކުން ފުށިދިއްގަރުފަޅު، ކ. ގުޅީގެ އިހްތިޞާސުން މިހާރު ވަނީ ވަކިކޮށްފައެވެ.
އަންނަ އަހަރަށް ލަފާކުރާ ދައުލަތުގެ ބަޖެޓުގައި ފުށިދިއްގަރުފަޅުގެ މަޝްރޫއަށް 400 މިލިއަން ރުފިޔާ ހިމަނާފައިވީ ނަމަވެސް މަޖިލީހުން ބަޖެޓު ފާސްކުރީ އެ ފައިސާ އުނިކުރުމަށްފަހުއެވެ. އެހެންކަމުން ސަރުކާރުން ވަނީ އެ މަޝްރޫއަށް ފައިސާ ހޯދާނެ ކަމަށް ބުނެފައެވެ.
މައުލޫމާތު ލިބިފައިވާ ގޮތުގައި އެ މަޝްރޫއު ހަވާލުކޮށްފައިވަނީ ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާއެވެ.
ރައީސް ޑރ. މުއިއްޒު މީގެ ކުރިން ހާމަކުރެއްވި ގޮތުގައި ފުށިދިއްގަރު ފަޅު ހިއްކުމުގެ އަމަލީ މަސައްކަތް ފެށޭތާ 8 މަސް ދުވަހުގެ ތެރޭގައި މަސައްކަތް އެއްކޮށް ނިންމާލެވޭނެއެވެ. ފުށިދިއްގަރުފަޅު ސަރުކާރުން ތަރައްގީކުރަނީ 20 އަހަރުގެ ދިގު ރާސްތާގެ ޕްލޭނަކަށް ބަހައިލައިގެންނެވެ. އެ މަޝްރޫއަށް 2025 ވަނަ އަހަރު 600 މިލިއަން ރުފިޔާ އަދި 2026 ވަނަ އަހަރު 350 މިލިއަން ރުފިޔާ ހިމަނަން ވަނީ ނިންމާފައެވެ.
