އިޚްލާސްތެރި މެމްބަރުން އެމްޑީޕީ އިން ވަކިވީ ޕާޓީގެ އަސާސްތައް މުގުރާލުމުން: އީވާ

ރާއްޖޭގައި އޮތް އެންމެ އެންމެ ބޮޑު ސިޔާސީ ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އިޚްލާސްތެރި ގިނަ މެމްބަރުންތަކެއް ޕާޓީއިން ވަކިވީ އެ ޕާޓީ މީހުން އަބަދުވެސް ޤަބޫލުކުރަމުން އައި އަސާސްތައް މުގުރާލާފައިވާތީ ކަމަށް ރައްޔިތުންގެ މަޖިލީހުގެ ނައިބު ރައީސް އީވާ އަބްދުالله ވިދާޅުވެއްޖެ އެވެ.

އެމްޑީޕީގެ ”ފިކުރެއްގެ ދިރުން“ ފެކްޝަނަށް ނިސްބަތްވާ ގިނަ މެމްބަރުންތަކެއް އެޕާޓީ އިން އިސްތިއުފާދެއްވުމަށްފަހު މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އީވާ ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞޯލިޙު ދިފާއުކުރަމުން ގޮސް އެމްޑީޕީގެ އޭގެމައްޗަށް ބިނާވެފައިވާ ހުރިހާ އަސާސްތަކެއް މުގުރާލާފައިވާ ކަމަށެވެ.

މިއަދު އަޅުގަނޑު MDP އިން ވަކިވެއްޖައިން.

ޙަޔާތެއް ވޭތުމިކުރީ MDP ގައި؛ހެޔޮވެރިކަން،އިންސާނީ ގަދަރު އަދި ކަރަޕްޝަން ނައްތައިލުމުގެ ވަކާލާތުގައި. މިއަދު MDP އަކީ އެ އަސާސްތަކުގެ ޕާޓީއެއް ނޫން.

އެހެނަސް އެ އަސާސްތަކާއި،އެވަކާލާތުކުރުން ދޫކޮށްލާން އަޅުގަނޑު ތައްޔާރެއް ނޫން! pic.twitter.com/hpjWvP4Hbx

— Eva Abdulla 🎈❓ (@evattey) May 17, 2023

އީވާ ވިދާޅުވީ އެމްޑީޕީ އުފެދުނީއްސުރެ މިހާތަނަށް އެ ޕާޓީގައި އެ މެންބަރުން ތިބީ އެމީހުން ޤަބޫލުކުރާ އަސާސްތަކެއް ހިފަހައްޓަމުން އައިސްފައިވާތީ ކަމަށެވެ. އަދި މިއަދު އެމްޑީޕީއަށް އެތައް ޚިދުމަތްތަކެއް ކޮށްދީފައިވާ އިޚްލާސްތެރި މެމްބަރުންތަކެއް ޕާޓީން ވަކިވާން ޖެހުނީ އެ އަސާސްތައް މުގުރާލާފައިވާތީ ކަމަށެވެ.

މީގެ އިތުރުން އިވާ ވިދާޅުވީ އެމްޑީޕީން ނަގަހައްޓަމުން އައި އަސާސްތައް މުގުރާލާ ޕާޓީ ފުނޑާލީ މި ސަރުކާރާއި ރައީސް އިބްރާހިމް މުޙައްމަދު ޞޯލިޙު ހިންގަވަމުންދާ ޖަރީމާތައް ދިފާޢުކުރުމަށްކަމަށެވެ.

އެމްޑީޕީ ގެ ރައީސް ނަޝީދު ފެކްޝަން ”ފިކުރެެއްގެ ދިރުން“ ނަމުގައި ސިޔާސީ ޕާޓީއެއް އުފައްދަން ފެށުނު މަސައްކަތާއި ގުޅިގެން އީވާ ވިދާޅުވީ އެމްޑީޕީން ނިކުމެ ސިޔާސީ ޕާޓީއެއް އުފެއްދުމަށް ފެށިގެން މި ދިޔަ މަސައްކަތަކީ ”ސިޔާސީ ކަސްތޮޅަކުން“ ލިބިގެންދިޔަ މިނިވަންކަމެއް ކަމަށެވެ. އަދި އެ މިނިވަންކަން މިހާރު އިޙުސާސް ކުރެވެމުންދާކަމަށް އޭނާ ވިދާޅުވި އެވެ.