މި މައްސަލާގައި ”ދިޔަރެސް“ ނޫހަށް މައުލޫމާތު ދެއްވަމުން ފުލުހުން އިސްވެރިޔަކު ވިދާޅުވީ އެމީހާ ފުލުހުންގެ ސްޓޭޝަނުން ފިލިއިރު އެތަނުގައި ތިބީ 2 ކޮންސްޓަބަލުން ކަމަށެވެ. އެ ދެ މީހުން ފިޔަވައި އެ ސްޓޭޝަނުގައި މަސައްކަތްކުރާ ހުރިހާ ފުލުހުން ތިބީ އދ.މަހިބަދޫގައި ކަމަށްވެސް އޭނާ ވިދާޅުވިއެވެ.
އިތުރަށް އޭނާ މައުލޫމާތު ދެއްވި ގޮތުގައި އެ ފުލުހުން މަހިބަދޫއަށް ދިޔައީ އެ ރަށުގައި އޮތް ފުޓުބޯޅަ މެޗެއް ކުޅުމަށެވެ. އެ މައްސަލާގައި ރަސްދޫ ޕޮލިސް ސްޓޭޝަނުގައި މަސައްކަތްކުރާ 12 ފުލުހަކު ސަސްޕެންޑުކޮށްފައިވާ ކަމަށްވެސް ފުލުހުން މަޢުލޫމާތު ދީފައިވެއެވެ. އެ ފުލުހުން ސަސްޕެންޑުކުރަން ނިންމީ ރަސްދޫ ޕޮލިސް ސްޓޭޝަން ކޮންސްޓަބަލުންނާ ހަވާލުކޮށްފައި ދިއުމުގެ ސަބަބުންކަމަށްވެސް އޭނާ ވިދާޅުވެފައިވެއެވެ.
ޙުސައިން ޝަޙްބާން އަކީ މަސްތުވާތަކެތި ބޭނުންކޮށް، އެތަކެތި ގެންގުޅެ، އެތަކެތީގެ ވިޔަފާރި ކުރާކަމަށް ތުހުމަތު ކުރެވޭ މައްސަލައެއްގައި ޝަރީއަތުން ގޮތެއް ނިމެންދެން ބަންދުގައި ބަންދުގައި ހުރި މީހެއް ކަމަަށްވެސް ފުލުހުން ވަަނީ ބުނެފައެވެ.
ޙުސައިން ޝަޙްބާންއާ ގުޅޭ މަޢުލޫމާތު ހިއްސާ ކުރުމަށް އެދި ސޯޝަލް މީޑިއާގައި ކުރި ޕޯސްޓް ޝެއާކޮށްދެއްވި އެންމެހައި ފަރާތްތަކަށް ފުލުހުން ވަނީ ޝުކުރު ދަންވާފައެވެ.
