ގަލޮޅު ދަނޑުގައި ބައިނަލްއަގުވާމީ ޔޯގާ ދުވަސް ފާހަގަކުރުމުގެ ގޮތުން ބޭއްވި ހަރަކާތްތަކަށް އަމާޒުކޮށް ހިންގި ހަމަނުޖެހުންތަކާ ގުޅިގެން ދައުވާ އުފުލާފައިވާ ޝެއިޚް ފަޒްލޫން މުހައްމަދާއި އާދަމް ނިޝާނަށް ވަކީލަކު އައްޔަން ކުރުމަށް ކްރިމިނަލް ކޯޓުން 10 ދުވަހުގެ ފުރުސަތެއް ދީފިއެވެ.
މިއަދު ކްރިމިނަލް ކޯޓުގައި ކުރިއަށް ދިޔައީ ޝަރީޢަތް ފެށުމުގެ ކުރިން ކަށަވަރުކުރަން ޖެހޭ ކަންކަމާއި ގުޅޭ މަރުހަލާއެވެ. މި މަރުހަލާގައި ގާޒީގެ ސުވާލުތަކަށް ޖަވާބުދެއްވަމުން ފަޒްލުނާއި ނިޝާނާއި ދެ މީހުން ވެސް ބުނެފައިވަނީ ކޮޓުން ހަވާލުކުރި ލިޔުންތައް ލިބިފައިވާ ކަމަށާއި، އެ ލިޔުންތައް ފުރިހަމަތޯ ބަލައި ދައުވާއަށް ޖަވާބުދާރީ ވާން ބޭނުންވަނީ ވަކީލަކާ އެކީ ކަމަށެވެ.
އެހެންކަމުން، ގާޒީ ވަނީ އެ މީހުން އެދުނުގޮތަށް އެ އިންތިޒާމް ހަމަޖައްސަދީފައެވެ.
