ވެންޓިލޭޓަރުގެ ވައްކަމާ ގުޅޭ ދައުވާ ނުކޮށް އޮތީ ޓެކްނިކަލް މައްސަލަ ހުރެގެން: ޝަމީމް

ދުބާއީގެ އެގްޒެކިއުޓާސްއާ ހަވާލުކޮށްގެން ކޮވިޑް-19ގެ ފަރުވާއަށް 75 ވެންޓިލޭޓަރު ރާއްޖެ ގެނައުމަށް ހެލްތު މިނިސްޓްރީއިން ހިންގި 34 މިލިއަން ރުފިޔާގެ މުއާމަލާތުގައި ހިމެނޭ ކޮރަޕްޝަން މައްސަލައިގައި ފާހަގަވެފައި ހުރި ޓެކްނިކަލް ކަންތައްތައް އެންޓި ކޮރަޕްޝަން ކޮމިޝަނުން ރަނގަޅު ކުރުމުން، އެ މައްސަލައިގައި ހިމެނޭ ފަރާތްތަކަށް ދައުވާ ކުރައްވާނެ ކަމަށް ޕްރޮސިކިއުޓާ ޖެނެރަލް (ޕީޖީ) ހުސެއިން ޝަމީމު ވިދާޅުވެއްޖެއެވެ.

ޕީޖީ ޝަމީމު މިހެން ވިދާޅުވީ، ޖިނާއީ މައްސަލަތަކާ ގުޅޭގޮތުން ޕްރޮސެކިއުޓާ ޖެނެރަލްގެ އޮފީހުގެ މަސްއޫލިއްޔަތު އަދާކުރަމުންދާގޮތާއި، އެ އޮފީހަށް ކުރިމަތިވާ ގޮންޖެހުންތަކާ ގުޅޭގޮތުން މަޝްވަރާކުރުމަށް، ރައްޔިތުންގެ މަޖިލީހުގެ ޖުޑީޝިއަރީ ކޮމިޓީއިން ޕްރޮސެކިއުޓާ ޖެނެރަލާ އެކު އިއްޔެ ބޭއްވި ބައްދަލުވުގައި އެ ކޮމިޓީގެ މެމްބަރު އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ކުރެއްވި ސުވާލަށް ޖަވާބު ދެއްވަމުންނެވެ.

ހަސަން ލަތީފުގެ ސުވާލަށް ޖަވާބު ދެއްވަމުން ޕީޖީ ޝަމީމު ވިދާޅުވީ، އޭސީސީން އެ މައްސަލައިގެ ތަހުގީގު ނިންމައި ދައުވާ ކުރުމަށް ޕީޖީއަށް ފޮނުވި އިރު ބައެއްކަހަލަ ކުދިކުދި ޓެކްނިކަލް މައްސަލަތައް ފާހަގަ ކުރެވިފައިވާ ކަމަށެވެ. އެކަންތައްތަކަކީ ޕީޖީއަށް މައްސަލަ ގެއްލުމުގެ ފުރުސަތު ބޮޑު ކަންކަން ކަމަށްވެސް ޝަމީމް ވިދާޅުވިއެވެ.

”ކޮންމެހެން އިސްލާހު ކޮށްލަންޖެހޭ ބައެއް ކަހަަލަ ކުދި ކުދި ޓެކްނިކަލް ކަންކަން އެބަހުރި، އެކަންކަން އިސްލާހު ނުކޮށް ގޮއްސިއްޔާ މައްސަލަ ގެއްލުމުގެ ފުރުސަތު އޮންނާނެ.“ ޝަމީމް ވިދާޅުވިއެވެ.

އެކަންކަން އިސްލާހުވުމުން މިހާރު ލިބިފައި ހުރި މައުލޫމާތުތަކުން އެކަމުގައި ބައިވެރިވި ބައެއްގެ މައްޗަށް ދައުވާ ކުރެވޭނެ ކަމަށްވެސް ޕީޖީ ޝަމީމު ވިދާޅުވިއެވެ.