ފިލިޕީންސް ގައި ވެކްސިން ޖަހަން ދެކޮޅު ހަދާ ރައްޔިތުން ޖަލަށް ލާނެ ކަމަށް އެގައުމުގެ ރައީސް ރޮޑްރިގޯ ޑުޓަރޓޭ ވިދާޅުވެއްޖެއެވެ.
ރޮޑްރިގޯ މިހެން ވިދާޅުވެފައި މިވަނީ އޭޝިއާ ބައްރުގައި އެންމެ ގަދައަށް ކޯވިޑު-19 ފެތުރެމުންދާ އެއް ގައުމަކަށް ފިލިޕިންސް ވުމާއި ގުޅިގެންނެވެ. އެގޮތުން އެ ގައުމުގައި މިހާތަނަށް 1.3 މިލިއަން މީހުންނަށް ކޯވިޑު-19 ޖެހިފައިވާއިރު، 23،000 މީހުން ވަނީ މިބަލީގައި މަރުވެފައެވެ.
އޭނާ މިހެން ވިދާޅުވެފައިވަނީ އެ ގައުމުގެ ބައެއް ވެކްސިން ސެންޓަރުތަކަށް ވެކްސިން ޖަހަން އަންނަ ފަރާތްތައް މަދުވަމުން އަންނަ ވަގުތެއްގައެވެ. އެހެންނަމަވެސް އެ ގައުމުގެ ހެލްތު އޮފިޝަލުން ވަނީ ވެކްސިން ޖެހުން މަޖުބޫރު ނޫންކަމަށް ބުނެފައެވެ.
ފިލިޕީންސް އަކީ 110 މިލިއަން މީހުންގެ އާބާދީއެއް އޮންނަ ގައުމެކެވެ. އަދި މިހާތަނަށް އެ ގައުމުގައި ވެކްސިން ދެވިފައިވަނީ އާބާދީގެ އެންމެ 5.8 އިންސައްތަ މީހުންނަށްކަން ފާހަގަކޮށްލެވެއެވެ
