ހުކުރު ދުވަހާއި ޢަރަފާތް ދުވަސް ދިމާވެއްޖެނަމަ، ހުކުރު ދުވަހު އެކަނި ރޯދަ ހިފުމުން ފުދޭނެ:ޢިލްމުވެރިން
ހުކުރު ދުވަހާ ޢަރަފާތް ދުވަސް ދިމާވެއްޖެނަމަ، ހުކުރު ދުވަހު އެކަނި ރޯދަ ހިފުމުން ފުދޭނެ ކަމަށް ރާއްޖޭގެ ދީނީ ޢިލްމުވެރިން ވިދާޅުވެއްޖެއެވެ.
އެގޮތުން ޝެއިޚް ޢަލީ ޒައިދު އަދި ޑރ.މުހައްމަދު އިޔާޒް އަބްދުއްލަތީފްގެ އިތުރުން އެހެން ބައެއް ދީނީ ޢިލްމުވެރިންވެސް ދަނީ މިކަން އޮންނަގޮތް އޮޅުން ފިލުވައިދެއްވަމުންނެވެ.
ޢަރަފާތު ދުވަހުގެ ރޯދަ އާއި ގުޅޭ ގޮތުން މަޢުލޫމާތު ހިއްސާކުރައްވަމުން ޒައިދު ވިދާޅުވީ ހުކުރު ދުވަހާ ޢަރަފާތް ދުވަސް ދިމާވެއްޖެނަމަ،ހުކުރު ދުވަހު އެކަނިރޯދަ ހިފުމުން ފުދޭނެކަމަށާއި،ހުކުރުދުވަހު ރޯދަ ހިފުން މަކުރޫޙައީ ހަމައެކަނި އެދުވަސް ޚާއްސަކޮށްގެން ރޯދަހިފާނަމަ ކަމަށެވެ. އަދި ޢަރަފާތްދުވަހުގެ ރޯދައަކީ ހުކުރު ދުވަސްވެގެން އެދުވަސް ޚާއްސަކުރަން ހިފާ ރޯދައެއްނޫން ކަމަށެވެ.
ހުކުރު ދުވަހާ ޢަރަފާތް ދުވަސް ދިމާވެއްޖެނަމަ، ހުކުރު ދުވަހު އެކަނި ރޯދަ ހިފުމުން ފުދޭނެ! ހުކުރުދުވަހު ރޯދަ ހިފުން މަކުރޫހައީ ހަމައެކަނި އެދުވަސް ޚާއްސަކޮށްގެން ރޯދަހިފާނަމަ! ހުކުރުދުވަސްވެގެން އެދުވަސް ޚާއްސަކުރަން ހިފާރޯދައެއްނޫން ޢަރަފާތްދުވަހު ރޯދައަކީ!
— Ali Zaid (@alizaid1000) July 6, 2022
ހުކުރު ދުވަހަށް ޚާއްސަކޮށްގެން ރޯދަ ހިފާނަމަ ރޯދަ މަކްރޫޙަ ވާކަމަށް ޢިލްމުވެރިން ވިދާޅުވެފައިވާއިރު، ދިވެހިންގެ ތެރޭގައި ބައެއް ފަރާތްތަކުން ދަނީ ޢަރަފާތުދުވަހާއި ހުކުރު ދުވަސް ދިމާވުމުން އޮޅުންއަރައި ސުވާލު އުފައްދަމުންނެވެ.
އެހެންކަމުން ގިނަ ދީނީ ޢިލްމުވެރިން މިވަނީ މިކަމުގައި އޮންނަގޮތް ސާފުކޮށްދީފައެވެ.
ޢަރަފާތް ދުވަސް ހުކުރަކާ ދިމާވިނަމަވެސް އެދުވަހުގައި ރޯދަ ހިފުމަކީ މައްސަލައެއް ނޫން. ޢަރަފާތް ދުވަހު ރޯދައަށް ހުރެއްޖެ މީހާގެ އިސްވެދިޔަ އަހަރުގެ ފާފަތަކާއި އަންނަން އޮތް އަހަރުގެ ފާފަތައް ފޮހެވިގެންދާނެކަން ރަސޫލާ ﷺ އަންގަވާފައިވޭ. ފުރުޞަތުގެ ބޭނުން ފުރިހަމަ ގޮތުގައި ހިއްޕަވާ.
— Dr.Mohamed Iyaz (@dr_iyaz) July 6, 2022
ޢަރަފާތް ދުވަހަކީ،އެދުވަސްތަކެއްގައި ރަސޫލުﷲ صلى الله عليه وسلم ރޯދަ ހިއްޕެވުމަށް އަވަސްވެވަޑައިގަތް ޙައްޖުމަހުގެ ފުރަތަމަ ނުވަދުވަހުގެ ތެރެއިން ދުވަހެކެވެ.
އަދި ޢަރަފާތް ދުވަހުގެ ރޯދަ ހިފުމަކީ އިސްވެދިޔަ އަހަރާއި ކުރިޔަށް އަހަރުގެ ފާފަތައް ފުއްސަވާނޭކަމެކެވެ.
ޢަރަފާތު ދުވަހު ރޯދަހިފުމާއި ގުޅޭގޮތުން ނަބިއްޔާ ﷺ ޙަދީޘް ކުރައްވާފައިވާ ބަސްފުޅެއްގެ މާނައިގައިވެއެވެ.
ޢަރަފާތް ދުވަހު ރޯދަ ހިފުމުގެ ސަބަބުން، އިސްވެ ދިޔަ އަހަރުގެ ފާފައާއި ކުރިއަށް އޮތް އަހަރުގެ ފާފަ ފުއްސަވާ ދެއްވާނެކަމަށް، ﷲ ތަޢާލާގެ ޙަޟްރަތުންތިމަންކަލޭގެފާނު އުންމީދުކުރައްވަމެވެ.
ޢަރަފާތްދުވަހު ރޯދަހިފުން ސުންނަތްވެގެންވަނީ ޙައްޖުވެރިން ފިޔަވައި އެހެންމީހުންނަށެވެ. ޢަރަފާތްދުވަހަކީ ޙައްޖުވެރިންނަށް ޢީދެކެވެ.
ރަސޫލުﷲ صلى الله عليه وسلم ހަދީޘް ކުރެއްވިއެވެ:
( إنَّ يومَ عرفةَ ويومَ النَّحرِ وأيَّامَ التَّشريقِ عيدُنا أَهْلَ الإسلامِ ، وَهيَ أيَّامُ أَكْلٍ وشربٍ )[9]
މާނައީ: ޢަރަފާތް ދުވަހާއި ނަޙްރުގެ (ޢީދު) ދުވަހާއި އައްޔާމުއް ތަޝްރީޤުގެ ދުވަސްތަކަކީ ތިމަންމެން އިސްލާމުންނަށްވާ ޢީދެވެ. އެއީ ކެއުމާއި ބުއިމުގެ ދުވަސްތަކެކެވެ.
